Anang Nyadi Baka Aku

Nama aku Jabun (ukai nama amai). Aku ada dalam taun 1981 serta diau di pelilih menua Kota Samarahan. Aku bedau bebini, ukai ketegal enggai ngentapka pendiau diri tang pengidup aku bedau tentu merua, semina kerja kuli. Nama kebuah aku nulis bekaul enggau pengidup aku? Aku ka bekunsi enggau bala kita nembiak rebak baru ngambika kita nemu milih jalai pengidup ti meruan.

Agi mit suba aku udah suah ngasai idup ti nyamai. Tambah mega aku semina anak tunggal. Aku endang diasi apai enggau indai.Apai enggau indai aku nadai bisi tentu bekaul enggau bala kaban belayan bukai. Seduai bisi muka restoran kedai maya nya suba. Pasal duit aku nadai kala bisi penanggul maya besekula. Ninting hari aku dibekal ngena duit RM10 ke sekula. Penguntung enggau pengerugi dagang seduai iya aku enda kala ngambi peduli. Setemu aku, minta duit kena aku injui. Maya agi pom dua aku udah dibeli ka apai aku ke motosikal. Yamaha RXZ yu yu motosikal aku maya nya. Bala kaban bukai rebak aku sigi ngining meda penyamai pengidup aku.

Gambar Pengias: Motosikal Yamaha RXZ

Maya sekula suba aku suah enda datai. Kini penungga? Segau-segau ngena motosikal, meda wayang, enggau ngaga ulah ke enda menuku. Suah amai apai aku dikangau ke sekula ketegal ke ulah enda menuku dadu aku, baka ketegal nginsap, ketegal ngirup arak, ketegal belayak,  ketegal suah enda datai sekula. Apai aku nyak semina meri jako ajar seleka dua udah nya nyau ia kiruh ka agi bisnis seduai indai.

Kitak ka nemu? Dalam seminggu engka sehari dua aja meh aku datai ke sekula. Enyak pun manah enti bisi datai, kadang-kadang dua minggu bejurut enda datai sekula. Enti sekula pun bisi aja ulah ke enda menuku. Bala cigu gaga agi enti aku enda datai. Aman dunya ko sida. Keni aku nemu deh? Bala kaban aku ke datai sekula nya meh ke ngereput ka aku. Dupah aku RM2 gaga meh sida jadi ulun aku.

Maya ngambi pemutus peresa pom tiga, aku nadai kiruh enggau orang ngambi slip pemutus peresa. Nama kebuah? Laban aku enda kala enggau orang ngambi peresa. Nye, kiruh ka enggau urang bebaris ba sekula. Laban maya jaman aku nya perintah endang sigi manah, aku ulih nyambung ngagai pom empat. Ga jaman kami ukai baka SRP, enti pil asuh urang ripit pom tiga. Kami ga jaman PMR. Masuk baru ga aku ke sekula, mua bala cigu te meda mua aku nyau baka antu. Ya ke bejai ka aku nibuh nyebut meh, nyau ka semua bala cigu enggai meda aku. Kati ka enda aku ga nembiak ka jai. Kala aku enyau ka bebukut ngau cigu disiplin siko suba. ko aku " Aku kala minta duit dik ka cigu? Nama dik kiruh ke hal aku!". Jai aku suba, ukai bula jai.

Maya Pom empat ngau Pom lima majak jai agi ga aku, baka bos meh aku ba sekula. Bala kunco-kunco aku nyak beri aku RM2 sehari. Gaga meh sida ya dulun aku. Ngaga kerja sekula meh sida dasuh aku. Ngibun aku nginsap ba mua pintu jamban meh sida asuh ku. Mina siti ajak meh enda ulih aku, pangan indu. Te enggai magang bala indu dicung aku. Gamal ge enda sigat jangka ku meh.

Maya peresa SPM hari minggu pengujung. Nadai te darap ke aku meh pemutus peresa maya nya. Ya ga aku nemu diri enda belajar ati amai baka kaban bukai. Mina ke nemu maca mimit-mimit laban belajar ba sekula primary suba. Ka nyadi cerita, maya aku pulai ari sekula, diak de aku meda urang mayuh ba rumah aku. Nya meh, aku enda nemu utai, aku ga enda pulai dua hari kemari laban te bisi belayak ngau apai aku, alu bemalam nepan ba rumah kawan aku. Mansa siko apai tuai, aku alu nanya "nama kebuah urang mayuh ba rumah kami ayak!, bisi pengerami pia?" Pia meh ko aku. Pia ko ayak nya nyaut " Apai enggau indai dik ensidin lemai mari, dua-dua seduai ya parai, kami enyau bendar begiga ka nuan kemari. Ninga jako ayak nya aku tegepang ati alu teduduk ba tanah. Bepusin dunya peda aku udah nya aku terus enda nemu nama te nyadi.

Dani-dani pagi meda diri ba klinik. Asai te baru dani bemimpi remban. Nya meh aku alu nyau beguai keluar, belanda pulai. Datai ba rumah aku rekau-rekau ngangau indai. Tang indai nadai nyaut. Kangau gak apai, apai pan enda nyaut. Abis bilik alai aku begiga ke seduai. Diak dek aku alu tegenung. Enda lama udah nya bisi siko apai tuai jiran kami ngesah ke aku kia. Laban te ninga aku nyau tekaung-kaung. Diak iya alu ngaum ke aku. Madah ke aku apai enggau indai aku udah nadai. Pia mega, iya nusi ka aku luput lemai kemari. Serta bangkai apai enggau indai aku udah di tanam laban nadai sapa-sapa kaban ti di anti. Keni ka bisi kaban, seduai ya nadai kala bisi kaul enggau orang ba menua. menua ni meh asal aku pan enda nemu. Semina nemu kami tiga tu urang datai. Nama meh penyadi aku deh? Nyabak meh aku diak sinu ngenang diri nyau kediri ditinggal enda madah apai enggau indai. Akai, dini meh aku tu ka beteduh? Sapa meh nyumai ka aku? Sapa meh meri aku duit belanja? Tusut runding aku maya nya.

Bepun ari sarinya meh aku idup kediri. Nasib ga bisi duit mimit dalam laci dalam bilik indai enggau apai ku te kena aku belanja makai ba kedai laban te enda nemu nyumai kediri. Restoran nadai durus ke aku laban te enda nemu utai, tutup kenya aja meh restoran seduai nyak. Makin sari, duit ke bisi majak mimit. Aku pan tinggal bebekal idup enggau mee Magi. Meda duit majak nadai, diak de aku ngambi cara muntang bejual ke bala perengka ke bisi dalam rumah. Siti-siti meh utai ku jual. Enda datai setaun, perengka rumah pan nyau abis. Nitih ati rumah nya pan ka ku jual. Tang nadai urang ka meli.

Laban aku nyau suntuk penemu, aku madah diri ka nepan ba rumah kaban. Naka sehari dua aja meh urang ka alai ku diau. Udah nya aku ngiga bala kaban ke kala dupah aku suba, tang sida ngaga diri enda ngelala aku agi. Bendar aku ngetan ka motosikal ka beri niang apai ka aku maya pom dua suba. pengujung iya jual aku gak motosikal nya laban te nadai duit.

Kepuas idup nadai duit dia dek aku encuba minta kerja. Minta kerja ba sebelah kedai makai ngica ka bisi makai percuma pama meh ko dalam ati. Mujur meh bisi kedai makai ka nerima aku gawa ari pemayuh kedai makai ka dipinta aku. Diak dek aku bepun idup diau ba atas kedai, makai gaji RM400 sebulan. Rumah kami ditinggal ka aku puang kenya aja meh laban ke jauh ari endur gawa. Ga motosikal udah dijual. Ni ulih bejalai kaki. Setiap taun gaji aku niki mimit kadang RM30 kadang RM50. Enya pun enti tokey bisi mayuh untung. Ka meh aku minta kerja bukai ke manah agi tang aku nadai sijil sekula. Sijil pom tiga suba ga enda kala ku ambi.

Ngasai enda beduit, nguji ga minta kerja bukai. Kerja nyadi tukang mancuh semin, makai gaji RM35 seari. Nyak pun ukai ulih kerja sepanjai bulan. Kadang enti ujan putung tokey ga gaji. Kadang putung laban pinjau kena ngirup. Ujung bulan, terima gaji kala nerima RM135 aja. Keni ka idup bekenya? Ka ngecung indu apatah agi. Buk nyau baka ribai tesat, kena tegar besi maya kerja kuntrik. Paling nyamai pengawa kala sepi aku, nyadi tukang cat. Enda ga entu ngelaban panas laban suah ngecat dalam rumah. Tang enda lama aja laban kompeni nya pindah ngagai menua seberai. Ngiga ga baru kerja bukai.

Gambar Pengias: Mancuh Semin

Baru-baru tu bisi betibas ngau bala kaban rebak maya sekula suba. Ka ngelari kediri meh ari betibas ngau sida tang sarinya nadai ulih dikelari ke aku. Nyau rekau-rekau ya ngagau ke nama aku. "O sanu, lama amai nadai betemu ngau dik neh! anang irau dik, aku sepunsor makai" ko ya. Peluang ga nya, perut ga lapar. Berandau meh kami duai diak. Nya ia nusi bisi sekeda kaban nyadi Engineer, Lutor, Cigu ngau macam-macam agi pengawa bukai ke jauh lebih menyana ari pengawa aku. Bala kaban mayuh ke bebeli ka rumah besai, kereta manah-manah. Baka aku mina agi nyewa ba rumah atas kedai. Ke tempat gawa ga aku agi bejalai kaki. Anang ga ka mikir bebini beranak, pengidup diri empu baka keranjai manuk.

Nyadi ke pengujung ya, aku nusi ukai ketegal aku ka ngayan ke diri kala idup nyamai. Tang aku ka bala kitak nembiak ke agi sekula, sekula meh bendar-bendar ngambi jadi urang ke beguna dudi ari jemah. Maya sekula anang ngaga ulah ke enda menuku. Datai meh ke sekula belama ngambi ke enda tinggal pelajar penemu ba sekula. Enti kitak begari manah diatu, bisi telipon canggih ba jari, nurun sekula ngena kereta manah, nya ukai reta kitak empu pengeraja, tang nyak reta apai indai. Kitak mina nepan pengaya sida. Baka aku udah apai indai nadai, idup kapa-kapa. Idup merinsa, bulih kerja semina ulih nyambung pengidup aja. Dinga meh pesan aku. Nesal dudi nadai reti, nesal dulu mai penguntung. Anang nyadi baka aku!


Kisah dalam cerita nya tadi nadai sangkut paut enggau te agi idup ataupun te udah parai.
Ia mina rekaan semata-mata kena meri jako peransang ngambika nembiak bebendar belajar maya sekula.

Ditulis,
Cgu Justine Amping