Jako Semengat Uduk Ka Tuan Iya

Nuju mensia ke disayau...

Mensia, aku meda nuan nyabak ketegal pemati aku. Anang meh nuan nyabak ka aku, aku semina bisi utai ka tusi ka nuan sepemanjai aku kala idup ngau nuan.

Gambar Pengias

Nuan sinu ketegal pemati aku tang aku gaga laban kala idup nyadi uduk ngau jelu tupi nuan. Nuan ka nemu? Naka pemayuh uduk bukai ke sebansa ngau aku mati ninting hari lalu sida enda kala betemu enggau mensia ti mentas baka nuan. Sida diau kediri, ngiga pemakai kediri, pia mega sida nadai urang nupi. Kami jelu semina nemu aus, lapar, celap mega nangi ke sebarang utai ti tau nanggul ka kami. Ninting hari meh sida bukai begiga ke pemakai ba sebelah tung uras ngica ke bisi tisa utai diempa kena nerus ka pengidup. Ninting malam sida begiga ke sebarang endur tinduk. Suah amai kami berati ke mua bala mensia te mansa kami, mayuh agi meh sida mensia ke enda malik ke kami. Manah agi meh sida enda malik ke kami, laban mayuh sida ke begedik ke kami. Pia mega, kami diburu disipak, dipaluk lalu suah meh kami diunsai ngau ai.

Aku nemu pemegi aku nyinu ka ati nuan, tang aku ngejang ke menua sebayan enggau pengaga. Badu meh nuan sinu.

Aku ka madah, anang meh nuan nyalah ka diri empu. Aku ninga nuan nyabak ke aku ketegal nuan ngumbai diri nadai terintu ka aku ngau manah. Laban ti kelalu sinu ke pemati aku nuan madah diri jerak nupi jelu. Anang meh nuan madah bekenya, nuan udah cukup mayuh ngadu utai serta ngemuan ke aku ari mit. Nadai nuan, aku baka jelu bukai ti diau ba sebelah tisi jalai, kaki lima. Laban nuan mega pengidup aku ngelamatu jauh meruan ari uduk bukai. Ketegal nuan mega pengidup aku jauh lebih likun. Nuan meri aku makai, tempat diau, serta suah amat nuan mai aku ngasai utai ti manah ke enda kala dasai uduk bukai.

Badu nuan nyabak. Aku pegi enggau pengaga. Aku mai pengingat atas nama ke beri nuan ke aku. Kaban bukai aku, nadai bertuah baka aku bisi nama. Penyamai pengidup aku kala nyadi jelu tupi nuan endang aku kenang belama ya. Leka sada nuan ngelamatu dikerindu ka aku tajapan aku enda nemu reti nama ke jako nuan ka aku. Pemanah ngau pementas nuan ka aku sigi ku kenang belama. Aku nadai nemu ka madah ka nuan bekeni aku penyayau ka nuan sekumbang ke agi idup. Setemu aku, mina nyalak ba mua rumah nuan enti bisi tepeda ka utai nyelai. Pia mega, aku ngipat ke iko aku madah diri gaga meda nuan. Mua nuan tuchum merening aku aja udah ngasuh aku gaga.

Mensia tuan aku, aku minta ampun ka penyalah ti kala digaga aku sekumbang ka agi idup suba. Nuan kala ringat ka aku ketegal selipar nuan putus digigit aku. Aku kala bira enggau kemi ba sengapa utai maya agi mit. Bendar amat nuan ngajar aku dini alai patut bira enggau kemi, tambah mega laban tua te enda mereti leka jako pangan diri. Aku kala ngerunsai ka tung uras ke di engkah nuan ba mua rumah. Nuan tetap sabar. Ngarap ka nuan ngampun semua penyalah aku. Enti nuan bisi nupi uduk bukai jemah, ngarap ka nuan mega sabar baka nuan nupi aku.

Tuan, aku ka madah ka nuan, mayuh bala uduk bukai nganti urang baka nuan nupi sida. Ngarap ka nuan enda berubah ati. Enda baka urang bukai, nupi uduk tang merinsa ka sida, enda meri sida makai, dikurung belama, ditancang ba rekung. Mayuh bala mensia bukai begedik meda kami, tang ukai semua. Bisi mega sida ka mentas baka nuan. Enti aku nemu bejako ngena bahasa nuan, naka pemayuh meh utai ka ku randau enggau nuan. Pesan aku, tajapan kami jelu, anang meh ngayah ka kami. Laban kami mega bisi nyawa enggau bisi ati. Kami mega jelu gaga Petara. Anang takut manah enggau jelu laban Petara nemu malas pemaik nuan.

Tuan ti dikesayau, badu meh nuan sinu ke pemati aku. Nama nuan terang bebendang dikingat ke aku. Maya malam malik meh nuan ke langit, enti nuan meda bintang bekecelik bekenya meh meda semengat aku kekipat iko gaga ati meda nuan ari jauh. Penudi ya, selamat tinggal tuan ti dikesayau, semengat aku nganti nuan ditu. Terus ka meh pengidup nuan baka selama.

Di karang,
Cikgu Justine Amping